John Arne Riise skoraði beint úr aukaspyrnu í þriðja landsleiknum í röð

Norðmaðurinn John Arne Riise var enn á ný á þrumu-skotskónum í 2-1 sigri Norðmanna á Makedóníu í undankeppni HM í Osló í gær. Riise spilar sem vinstri bakvörður en það kom þó ekki í veg fyrir að hann yrði markahæsti leikmaður Norðmanna í undankeppninni.

John Arne Riise skoraði markið sitt beint úr aukaspyrnu en þetta var þá þriðji landsleikurinn í röð sem hann skorar með þrumuskot úr aukaspyrnu. Riise skoraði einmitt beint úr aukaspyrnu á móti Íslendingum á Laugardalsvellinum á laugardaginn. Hann skoraði einnig beint úr aukaspyrnu í 4-0 sigri á Skotum.

„Ég hef skipt um skó fyrir hvern leik og ég verð greinilega að halda áfram að gera það," sagði John Arne Riise í léttum tón eftir leikinn. Öll mörkin þrjú hafa komið í fyrri hálfleik, hann skoraði á 35. mínútu á móti Skotum, á 11.mínútu á móti Íslandi og á 26. mínútu á móti Makedóníu í gær.

John Arne Riise var markahæsti maður níunda riðils ásamt Eiði Smári Guðjohnsen og Hollendingunum Klaas-Jan Huntelaar og Dirk Kuyt. Allir skoruðu þeir þrjú mörk.