Englendingar í úrslitin

England tryggði sér í dag sæti í úrslitum Evrópumeistaramótsins í knattspyrnu eftir sigur á Hollandi í framlengdum leik, 2-1.

Staðan var markalaus eftir fremur bragðdaufan fyrri hálfleik en Kelly Smith kom Englandi yfir á 61. mínútu með laglegu skoti úr vítateignum.

En aðeins tveimur mínútum síðar náði hollenska liðið að jafna úr einni af fáum sóknum sínum í leiknum. Marlous Pieete var þar að verki, einnig með fínu skoti úr vítateignum.

Ekkert var skorað og allt útlit fyrir að úrslita leiksins myndu ráðast í vítaspyrnukeppni. England fékk þá hornspyrnu á 116. mínútu og skoraði varamaðurinn Jill Scott sigurmark leiksins með skalla.

England mætir annað hvort Þýskalandi eða Noregi í úrslitunum á fimmtudaginn næstkomandi en síðari undanúrslitaviðureignin fer fram á morgun.