Liverpool og Real Madrid eru að tala saman um Xabi Alonso

Spænskir miðlar greina frá því í morgun að viðræður séu í gangi milli Liverpool og Real Madrid um kaup spænska liðsins á Xabi Alonso frá Liverpool. Fulltrúar beggja liða hittust í Barcelona í gær og ræddu kaupin samkvæmt heimildum spænsku blaðanna AS og Marca.

AS segir að Real sé búið að bjóða 30 milljón evrur en Liverpool vill frá 5 milljónum meira fyrir spænska landsliðsmiðjumanninn.

Marca segir að Liverpool vilji fá 40 milljónir evra fyrir hinn 27 ára gamla Alonso, 35 milljónir og síðan að 5 milljóna bónus nái Real ákveðnum árangri.

Spænsku miðlarnir hafa það eftir Xabi Alonso að hinn vilji bara að þetta mál klárist á hvorn veginn sem það endar þannig að hann geti bara farið að einbeita sér að komandi tímabili með sínu liði hvort sem það verður áfram Liverpool eða Real Madrid.

Real Madrid er þegar búið að eyða meira en 200 milljónum evra í leikmenn í sumar og fengið til sín menn eins og Cristiano Ronaldo, Karim Benzema og Kaka.