Wenger er ekkert viss um að nota Wilshere mikið á tímabilinu

Arsene Wenger, stjóri Arsenal, ætlar að passa upp á hinn 17 ára gamla Jack Wilshere sem skoraði tvö mörk í 3-0 sigri liðsins á skosku meisturunum í Rangers í gær. Wilshere lék mjög vel í leiknum en hann þykir einn allra efnilegasti knattspyrnumaður Englands.

„Ég veit ekkert hvað hann fær að spila mikið á tímabilinu. Það er erfitt að spá fyrir um það," sagði Wenger eftir leikinn. „Eina vandamálið er að halda honum á sinni braut því ég þekki vel óþolinmæðina í ensku þjóðinni," sagði Wenger.

Fabio Capello, landsliðsþjálfari Englands, var meðal áhorfenda og ensku blaðamennirnir voru strax farnir að velta því upp hvort Jack Wilshere yrði í HM-hópnum. „Verum nú alveg róleg. Það er enn ár í HM og við verðum að sjá hverjar framfarir hans verða og hversu stöðugur hann verður," sagði Wenger og bætti við:

„Bíðum með að búa til stjörnu úr honum eftir aðeins tvo leiki og gefum þessum unga leikmanni sinn tíma til að vaxa og þroskast," sagði Wenger.