Ancelotti: Að búa til fótboltalið er eins og að búa til ost

Carlo Ancelotti, stjóri Chelsea segir margt líkt með því að stýra bestu félagsliðum í heimi og framleiða ost á fjölskyldubóndabænum í æsku. Ancelotti hefur nefnilega nýtt sér reynsluna úr sveitinni, þegar hann var ungur, á ferli sínum sem knattspyrnuþjálfari.

„Faðir minn var bóndi og mjólkaði kýr. Mikilvægasta afurðin frá kúnum var mjólkin og við notuðum hana til þess að búa til parmesan-ost. Ég lærði að vera þolinmóður þegar ég vann við ostagerðina," segir Ancelotti í viðtali Sunday Mirror.

„Það tekur ár að búa til parmesan-ost. Það má segja það sama um að búa til lið. Maður kemur inn með hugmyndafræði og áherslur og sér síðan útkomuna einu eða tveimur árum síðar," sagði Carlo Ancelotti sem ætlar sér greinilega tíma til að móta sitt Chelsea-lið.