Voronin ætlar sér að spila mikið með Liverpool á tímabilinu

Úkraníumaðurinn Andriy Voronin er ekki kominn aftur til Liverpool til þess að sitja á bekknum. Voronin stóð sig frábærlega með Hertha Berlin í þýsku deildinni á síðasta tímabili eftir að hafa farið þangað á láni.

Voronin kom til Liverpool frá Bayer Leverkusen árið 2007 en gekk illa á sínu fyrsta tímabili. Hann fékk hinsvegar sjálfstraustið aftur í Berlín þar sem að hann skoraði 11 mörk og gaf 8 stoðsendingar í 20 leikjum.

„Ég talaði við Rafa Benitez áður en ég kom aftur og hann sagði mér að égþyrfti að leggja mikið á mig til þess að komast í Liverpool-liðið. Til þessa hef ég verið með í öllum undirbúningsleikjunum þrátt fyrir mikla samkeppni," sagði Voronin bjartsýnn við þýska blaðið Bild.

„Ég er ekki hræddur við harða samkeppni. Ég er tilbúinn að berjast fyrri mínu sæti í liðinu og ég ætla mér ekki að sitja á bekknum," sagði Voronin en hann á að baki 28 leiki og 6 mörk með Liverpool í öllum keppnum.

Voronin viðurkennir það þá að hann hefði alveg viljað vera áfram hjá Hertha Berlin en þýska félagið hafði ekki efni á að kaupa hann frá Liverpool. „Það var frábært fyrir minn feril að fara til Herthu og vonandi græði ég á því á þessu tímabili," sagði Voronin.