Eggert byrjaður að æfa á ný eftir mánaðar fjarveru

Eskfirðingurinn Eggert Gunnþór Jónsson er byrjaður að æfa á ný með liði sínu Hearts í Skotlandi eftir að vera búinn að jafna sig á meiðslum.

Eggert Gunnþór fór í uppskurð fyrir um mánuði síðan eftir að hafa rifið vöðva í maga og hefur því misst af nokkrum leikjum með skoska félaginu.

„Eggert byrjaði að æfa aftur í dag og það var skemmtileg sjón að sjá hann aftur á æfingarsvæðinu," segir knattspyrnustjórinn Csaba Laszlo hjá Hearts.

Eggert Gunnþór gat þó ekki gefið kost á sér í næstu verkefni U-21 árs landsliðsins gegn San Marínó og Norður-Írum í undankeppni EM 2011 en leikirnir fara fram á Íslandi 9. og 13. október.