Moyes hrósar nýjustu stjörnu Everton

Jack Rodwell heitir nýjasta vonarstjarna Everton. Hann skoraði tvö mörk í 4-0 sigrinum á Sigma Olomouc í undankeppni Evrópudeildarinnar og hrósar David Moyes, stjóri félagsins honum í hástert.

Rodwell er aðeins 18 ára gamall og er nýbúinn að fá fimm ára samning hjá Everton.

„Hann sýndi hvers megnugur hann er. Hann stýrði leiknum á tímabili. Skotin hans komu mér á óvart, hann hefur góða skottækni en ég hef enn ekki séð hann þenja netmöskvana svona, sagði Moyes en Rodwell er miðjumaður.

Í desember 2007 varð hann yngsti leikmaður í sögu Everton til að spila keppnisleik með aðalliði félagsins. Hann verður notaður sparsamlega á tímabilinu.

„Jack er mikið efni og vonandi mun hann uppfylla væntingarnar sem gerðar eru til hans. Við munum spila hann inn í þetta hjá okkur. Hann á enn nokkuð í land. Við munum nota hann í leikjum ef hann heldur sér í góðu formi," sagði Moyes