Romario farinn á fullt í stjórnmálin

Brasilíski markahrókurinn Romario er nú alveg hættur í fótboltanum og farinn í stjórnmálin í heimalandi sínu. Hann er á framboðslista Sósíalistaflokksins í brasilísku þingkosningunum á næsta ári.

„Romario mun leggja fram sín stefnumál og ætlar ekki bara að treysta á atkvæði sinna aðdáenda," sagði fulltrúi flokksins í blaðaviðtali. Romario hefur verið mikið í fréttum undanfarin vegna skattaskuldar og þá er hann einnig flæktur í veðmálahneyksli. Hann lætur það þó ekki hindra sig í að bjóða sig fram.

Romario de Souza Faria er 43 ára gamall en hann skoraði 70 mörk í 80 landsleikjum með Brasilíu og var aðalmaðurinn á bak við Heimsmeistaratitilinn sem Brasilía vann árið 1994. Hann spilaði á sínum tíma með liðum PSV Eindhoven og Barcelona en endaði ferilinn með Vasco de Gama árið 2008.