Ólafur ánægður fyrir hönd Eiðs Smára

Ólafur Jóhannesson landsliðsþjálfari er ánægður með að Eiður Smári Guðjohnsen sé genginn í raðir franska úrvalsdeildarfélagsins AS Monaco.

„Mér finnst þetta frábært og flott breyting hjá honum. Hann hefur verið bæði hjá Chelsea og Barcelona sem eru tveir af stærstu klúbbum Evrópu. Þar hefur hann verið geysilega sigursæll," sagði Ólafur.

„Nú fer hann til félags sem er ekki í sama gæðaflokki og hin voru. Það er því eflaust ætlast til þess af honum að hann hífi liðið upp. Eiður Smári er örugglega rétti maðurinn til þess."

„Ég tel þetta því bæði skemmtilegt og ögrandi verkefni fyrir hann. Eiður Smári hefur líka þann eiginleika að komast teinréttur í gegnum erfiðleika. Það hefur hann margsýnt. Ég held því að hann muni gera góða hluti í Frakklandi."

Hann neitar því ekki að það komi til með að hjálpa landsliðinu að Eiður Smári fái að spila meira en hann hefur gert undanfarin ár.

„Ég hef alltaf sagt að hjálpi mönnum að spila og ég sannfærður um að það hafi góð áhrif á liðið að hann sé kominn með fast sæti í liði."