Argentína fékk á sig sex í fyrsta skipti í hálfa öld

"Náið í vasareikninn!" sagði fyrirsögn í argentínska blaðinu Ole í dag eftir að Argentínumenn fengu einn versta skell í sögu knattspyrnulandsliðsins í gær.

Þar var vísað í 6-1 útreiðina sem lærisveinar Diego Maradona fengu í þunna loftinu í Bólivíu í undankeppni HM í gær.

Þetta var í fyrsta sinn síðan árið 1958 sem Argentínumenn fá á sig sex mörk í leik. Skellurinn var sá stærsti síðan liðið tapaði 5-0 heima fyrir Kólumbíu snemma á tíunda áratugnum.

Situr Argentína eftir?

Fátt benti til þess að Argentínumenn yrðu rassskelltir svo hrikalega þegar þeir unnu sannfærandi 4-0 sigur á Venezuela á laugardaginn, en í gær fengu þeir dýrmæta lexíu gegn einu af slökustu liðum Suður-Ameríkuriðilsins.

Argentína er í fjórða sæti tíu liða riðilsins, en fjórða sætið er einmitt síðasta sætið sem gefur liðunum sjálfvirkan þátttökurétt á HM 2010.

Ef liðið hafnar í fimmta sæti þarf það í umspil en sjötta sætið myndi þýða að martröð Maradona og félaga yrði að veruleika: Að komast ekki á HM í fyrsta skipti í 40 ár.

Erfiðir leikir eftir

Argentínumenn eiga erfiða leiki eftir í riðlinum, þar á meðal heimsókn á annan völl sem er í mikilli hæð yfir sjávarmáli í Ekvador, þar sem þeir töpuðu síðasta leik sínum 1-0. Liðið á líka eftir útileik gegn Paragvæ, þar sem liðið tapaði líka síðasta leik sínum.

Þá eiga Maradona og félagar eftir heimaleik gegn Brasilíu og útileik gegn Úrúgvæ í Montevideo - en það er leikur sem er ekki gott að fara í með bakið upp að vegg.

Þunna loftið engin afsökun

Flestir sparkspekingar eru á því að það hafi haft sitt að segja fyrir Argentínumennina í gærkvöld að leikurinn var spilaður í 3.600 metra hæð yfir sjávarmáli, en þar er loftið orðið ansi þunnt til að spila fótboltaleik. Þó sé það ekki nógu góð afsökun fyrir annari eins útreið og Argentína fékk í gær.

Maradona er reyndar einn þeirra manna sem hvað mest beittu sér fyrir því að Bólivíumenn, sem og aðrir sem spila í mikilli hæð yfir sjávarmáli, þyrftu ekki að skipta um heimavelli líkt og FIFA hafði áformað að setja í lög.