Sigurður Ragnar: Það vilja allir leikmennirnir sanna sig

Sigurður Ragnar Eyjólfsson, landsliðsþjálfari, segir að það verði lítið mál að gera íslenska liðið tilbúið í að mæta Heims- og Evrópumeisturum Þýskalands í Tampere í dag þrátt fyrir að möguleikar íslensku stelpnanna að komast í átta liða úrslitin séu úr sögunni.

"Við notum þennan leik sem tækifæri til að læra meira um okkur sjálfar og hvernig liðið spilar á móti besta liði heims," sagði Sigurður Ragnar.

"Það hefur alltaf þýðingu að spila landsleik og hvað þá á móti Heims- og Evrópumeisturunum á stórmóti. Það er mjög margt við þennan leik sem er sérstakt og eftirminnilegt og þetta er ævintýri. Það vilja allir leikmennirnir sanna sig og við höfum engu að tapa í þessum leik," segir Sigurður Ragnar sem breytti liðinu nokkuð frá því í fyrstu tveimur leikjunum.

"Áherslurnar á móti Þýskalandi verða ekkert stórkostlega öðruvísi frá því hinum leikjunum því við höfum spilað þá leiki ágætlega. Við erum að fara að spila við ógnarsterkt lið og við munum leggja áherslu á að spila góða vörn, sækja hratt og nýta okkur föst leikatriði," sagði Sigurður Ragnar.

Þýska landsliðið hefur unnið tvo fyrstu leiki sína með markatölunni 9-1 og liðið hefur orðið Evrópumeistari undanfarnar fjórar keppnir.

"Tölfræðin hjá Þýskalandi í stórmótum er alveg fáránleg og við vitum það alveg að við erum í hlutverki litla liðsins. Við erum líka í hlutverki litla liðsins sem getur gert stóru liðunum skráveifu og við höfum gert það áður. Við höfum trú á því að við getum náð góðum úrslitum úr þessum leik," sagði Sigurður Ragnar að lokum.