Bjarni Jóh.: Þetta eru að verða karlmenn

„Já þetta var ótrúlega sprækur leikur af okkar hálfu," sagði Bjarni Jóhannsson, þjálfari Stjörnunnar að loknum 6-0 sigri sinna manna á Þrótti á Valbjarnarvelli.

„Menn voru eins og beljur að vori á grasinu," sagði Bjarni en Stjörnumenn spila heimaleiki sína á gervigrasi. „Það er alltaf ákveðin stemning að spila á grasi."

Bjarni hefur mikla trú á sínum mönnum. „Við erum með dugnaðarlið og það er steming eftir góða byrjun síðast," segir Bjarni en Stjörnumenn sitja nú á toppnum.

„Þetta er kannski stórhættulegur sigur maður," sagði hann en bætti við: „Það er samt alltaf gaman þegar leikmenn koma þjálfaranum sínum á óvart með ferskum leik."

Innan knattspyrnuheimsins er þekktur frasi Bjarna þar sem hann skipar sínum mönnum að „fara þetta bara á bringuhárunum."

Fóru þínir menn þetta á bringuhárunum í kvöld? „Já þeir eru farnir að safna bringuhárum þessir drengir. Þetta eru að verða karlmen," sagði sigurreifur Bjarni Jóhannsson.