Teitur og lærisveinar hans í eldlínunni í nótt

Vancouver Whitecaps heldur áfram leið sinni að því að verja titil sinn í Norður-amerísku USL-1 deildinni undir stjórn Skagamannsins Teits Þórðarsonar en félagið mætir Carlolina RailHawks í fyrstu umferð úrslitakeppninnar í nótt.

Whitecaps hefur átt undir högg að sækja vegna meiðsla lykilmanna á þessu keppnistímabili en félagið endaði í sjöunda sæti í deildarkeppninni en Teitur og félagar geta þó glaðst yfir því að fyrirliðinn Martin Nash, bróðir NBA-körfuboltaleikmannsins Steve Nash, er klár í slaginn á ný eftir meiðsli.

Whitecaps hefur annars verið á mikilli siglingu undanfarið og tapaði aðeins einum af síðustu tíu leikjum sínum í deildarkeppninni og Teitur vonast til þess að góða gengið eigi eftir að fylgja Whitecaps inn í úrslitakeppnina.

„Við vitum að Carlolina er með gott lið en við komum líka fullir sjálfstrausts inn í þessa úrslitakeppni," segir Teitur í viðtali við The Vancouver Sun.

Það félag sem er fyrst til þess að vinna tvo leiki í rimmunni kemst áfram í aðra umferð.