Aston Villa vann Juventus í úrslitaleik Friðarbikarsins

Aston Villa vann Friðarbikarinn á Spáni eftir sigur á ítalska liðinu Juventus í vítakeppni í úrslitaleik æfingamótsins í gær. Leikur liðanna endaði með markalausu jafntefli.

Brad Guzan, bandaríski markvörðurinn í liði Aston Villa, varði vítaspyrnur frá Alessandro del Piero og Vincenzo Iaquinta í vítakeppninni auk þess að Nicola Legrottaglie klikkaði á síðustu spyrnu Juventus.

Steve Sidwell og Chris Herd klikkuðu líka á vítum hjá Aston Villa en það var Carlos Cuellar sem tryggði Aston Villa 4-3 sigur í vítakeppninni.

Aston Villa lék án Emile Heskey í leiknum en hann var í banni eftir að hafa fengið rauða spjaldið í undanúrslitaleiknum á móti Porto.

Það hefur verið keppt um Friðarbikarinn á tveggja ára fresti frá 2003 en þetta var í fyrsta sinn sem keppnin fór fram fyrir utan Suður-Kóreu.

Sigurlið Friðarbikarsins frá upphafi:

2003 PSV Eindhoven (vann Olympique Lyonnais 1-0)

2005 Tottenham Hotspur (vann Olympique Lyonnais 3-1)

2007 Olympique Lyonnais (vann Bolton Wanderers 1-0)

2009 Aston Villa (vann Juventus í vítakeppni)