Gabriel Agbonlahor fær stuðning frá Luke Young

Markaleysi Gabriel Agbonlahor, framherja Aston Villa, hefur verið í umræðunni að undanförnu enda hefur Agbonlahor aðeins skorað eitt mark í síðustu sextán leikjum með Villa.

Á dögunum var púað á strákinn þegar honum var skipt útaf í leik á móti Tottenham en stjórinn Martin O'Neill var reyndar fljótur að gagnrýna það háttalag stuðningsmanna félagsins. Nú hefur landsliðsmaðurinn Luke Young einnig komið fram og stutt við bakið á Agbonlahor.

„Í byrjun tímabilsins þá fór allt inn sem Gabby (Agbonlahor) snerti fyrir framan markið. En það koma líka kaflar þar sem ekkert gengur upp. Þá skiptir oft ekki máli hversu mikið þú leggur á þig því hlutirnir detta ekki fyrir þig," segir Young.

„Ég er viss um að þetta fari að breytast hjá Gabby. Hann verður bara að halda áfram að koma sér á réttu staðina og þá hljóta mörkin að fara að detta inn að nýju," sagði Young.

„Hann er frábær framherji sem var kominn inn í enska landsliðið á þessu tímabili," sagði Young sem segir að Aston Villa liðið þurfti að berja sig saman eftir nokkur döpur úrslit í síðustu leikjum.

„Við erum ekki að spila eins vel og við höfum verið að gera. Úrslit leikjanna sýna það," segir Young sem segir liðið ætli sér að ná markmiðum tímabilsins sem er að komast í hóp þeirra bestu í deildinni.

„Það eru átta leikir eftir og ég er viss um að stjórinn okkar er að skoða það núna hvað það er sem við þurfum að gera betur á lokasprettinum," sagði Young en Aston Villa er í harðri baráttu við Arsenal um fjórða sætið sem er síðasta sætið sem gefur þátttökurétt í Meistaradeildinni á næsta ári.