Fimmhundraðasti leikur Lúðvíks sem liðsstjóri KR

Heimasíða KR segir frá því í dag að úrslitaleikur Reykjavíkurmóts karla á sunnudagskvöldið verði mikill tímamótaleikur fyrir Lúðvík Júlíus Jónsson sem hefur verið liðsstjóri meistaraflokks karla í Vesturbænum frá árinu 1996.

Leikurinn á móti Fylki verður 500. leikur "Lúlla" í liðsstjóraembættinu en hann hefur aðeins misst úr fimm leiki á þessum þrettán árum en hér er átt við opinbera leiki en ekki æfingaleiki. Lúðvík hefur aldrei misst af deildarleik, bikarleik eða leik í Evrópukeppni á þessum tíma.

Ólafur Brynjar Halldórsson ritstjóri vefs knattspyrnudeildar hefur haldið vel utan um alla tölfræði meistaraflokka KR og hann hefur tekið saman yfirlit yfir liðstjóraferil Lúðvíks á heimasíðunni. Það má sjá grein Ólafs um Lúðvík hér.

Lúðvík getur einnig glaðst yfir því að hafa endurheimt soninn í KR en Magnús Már Lúðvíksson er kominn aftur heim í Frostaskjólið eftir að hafa spilað með Val, ÍBV og Þrótti undanfarin sex tímabil.

Magnús Már skoraði meðal annars í sínum fyrsta opinbera leik með KR þegar liðið vann 5-3 sigur á hans gömlu félögum í Þrótti og tryggði sér fullt hús í sínum riðli í Reykjavíkurmótinu.