Mótmælendur í hár saman

Skipuleggjendur mótmæla á Austurvelli virðast vera komnir í hár saman ef marka má fréttatilkynningu sem Raddir fólksins sendu fjölmiðlum fyrir stundu. Raddir fólksins standa fyrir mótmælafundi í fimmtánda sinn á Austurvelli klukkan þrjú í dag. Fyrir hópnum fer Hörður Torfason tónlistarmaður. Korteri síðar hefst svo annar mótmælafundur á Austurvelli sem Nýjar raddir standa fyrir. Fyrir þeirri hreyfingu fer Ástþór Magnússon friðarsinni. Raddir fólksins sendu frá sér fréttatilkynningu vegna Nýrra radda.

„Af gefnu tilefni vilja samtökin Raddir fólksins koma því á framfæri að svonefndar „Nýjar raddir" sem boðað hafa fund á Austurvelli kl. 15:15 í dag, laugardaginn 17. janúar, hafa ekki sótt um tilskilin leyfi til lögregluyfirvalda fyrir fundarhöldum," segir í tilkynningunni. Raddir fólksins halda því fram að boðaður fundur Ástþórs Magnússonar sé því ólöglegur og óréttmætur sem slíkur og beri að harma að Íslendingur skuli fara fram með jafn lágkúrulegum hætti. Nýjar raddir sendi svo stundu seinna frá sér tilkynningu þar sem fullyrt var að Raddir fólksins færu með ósannindi þegar fullyrt væri að Nýjar raddir á Austurvelli hafi ekki tilkynnt sig til lögreglunnar.

Geir Jón Þórisson, yfirlögregluþjónn á höfuðborgarsvæðinu, segir í samtali við Fréttastofu að samkvæmt lögum þurfi ekki að fá leyfi til að mótmæla. Hins vegar þurfi mótmælendur að tilkynna til lögreglustjóra að þeir hyggist efna til mótmæla. Geir Jón sagðist ekki vita til þess að síðari mótmælin hafi verið tilkynnt. Hann sagði þó að engin viðurlög lægju við slíku en ef að mótmælin yllu röskun, til dæmis á umferð, þá myndi lögreglan grípa til ráðstafana.