Ómar velur stelpurnar sem koma á UEFA-blaðamannafundina

Tveir leikmenn íslenska kvennalandsliðsins þurfa að mæta ásamt þjálfaranum Sigurði Ragnari Eyjólfssyni á blaðamannafund daginn fyrir hvern leik á EM í Finnlandi . Blaðamannafundurinn er haldinn af UEFA og þar eru erlendir blaðamenn oft í meirihluta.

Fyrir Frakkaleikinn voru það Katrín Jónsdóttir, fyrirliði og Guðrún Sóley Gunnarsdóttir sem voru fulltrúar íslenska liðsins en í dag voru þær Þóra Björg Helgadóttir og Ólína Guðbjörg Viðarsdóttir sem þurftu að svara spurningum á ensku upp á pallborði.

Ómar Smárason, fjölmiðlafulltrúi íslenska liðsins, velur þær stelpur sem koma á fundinn í samráði við landsliðsþjálfarann. Hann hefur ákveðið að dreifa þessum skyldum á milli leikmanna og hver og ein þarf bara að fara einu sinni á UEFA-blaðamannafund.