Erla Steina kallaði fram fyrsta brosið eftir Frakkaleikinn

Söngur og dans frá Erlu Steinu Arnardóttur í fullum Tinu Turner skrúða átti mikinn þátt í því að kvennalandsliðið náði að rífa sig upp úr vonbrigðum Frakkaleiksins en liðið var enn mjög langt niðri í morgun eftir svekkjandi tap í gærkvöldi.

Stelpurnar töluðu um það sjálfar á æfingu í dag að fyrsta brosið eftir Frakkaleikinn hafði brotist fram eftir að Erla Steina steig fram og söng Tinu Turner lag í svaka búningi. Atriðið var hluti af félagslegum verkefnum innan liðsins þar sem hver leikmaður þarf að gera eitthvað fyrirfram ákveðið.

Erla Steina steig fram í hádegismatnum og skemmti félögum sínum í liðinu með eftirminnilegum hætti samkvæmt þeim sem urðu svo heppnir að vera vitni af herlegheitunum.

Það mátti sjá það á æfingu liðsins í dag að stelpurnar voru farnir að brosa og skemmta sér saman enda er stutt í næsta leik og því mikilvægt að komast yfir Frakkaleikinn sem fyrst.