Geta endurskrifað hollenska fótboltasögu í kvöld

Hollenska landsliðið á möguleika á að ná hundrað prósent árangri í undankeppni HM vinni þeir sigur á Skotum á Hampden í kvöld. Ekkert hollenskt landslið hefur náð að vinan alla leiki sína í undankeppni hvort sem það er fyrir HM eða EM.

„Það er sérstök hvatning fyrir mig að ná því að vinna alla leikina. Leikmenn eru allir mjög einbeittir að ná þessu markmiði og við höfum líka skyldur gagnvart Norðmönnum og Makedóníubúum," sagði þjálfari Hollendinga, Bert van Marwijk. Skotar eru í baráttu við Norðmenn og Makedóníumenn um 2. sætið í riðlinum.

„Þetta er alvöruleikur fyrir okkur og það munu allir bestu leikmenn mínir spila," sagði Van Marwijk og bætti við: „Við sáum Skota vinna Makedóníu á laugardaginn þar sem að þeir spiluðu vel og við vitum að þetta er síðasti möguleikinn hjá þeim," sagði Van Marwijk sem býst við allt öðrum leik en þegar Holland vann 3-0 sigur á Skotum á heimavelli.

„Þetta verður allt annað lið hjá þeim, þeir spila til sigurs og munu gefa allt sitt í leikinn. Það verður líka allt öðruvísi að spila fyrir 50 þúsund manns á Hampden," sagði van Marwijk.