Gunnar Odds: Heppnir að tapa ekki stærra

„Það er lítið hægt að segja eftir svona leik," sagði niðurlútur Gunnar Oddsson eftir að lærisveinar hans hlutu 6-0 skell á heimavelli sínum í kvöld gegn Stjörnunni.

„Strax eftir að við fengum fyrsta markið á okkur misstu menn trúnna á þetta. Fram að því fannst mér svo sem ekki mikið í kortunum hjá þeim. Við vissum þó að þessi föstu atriði væru hættuleg hjá þeim. Þessi innköst," sagði Gunnar og á þá við flikk innköst Steinþórs Freys Þorsteinssonar en upp úr þeim komu tvö marka Stjörnunnar.

Þróttarar komu eilítið beittari úr búningsklefum inn í seinni hálfleik. „Við fórum við að færa okkur framar á völlinn en þeir eru með skæða menn fram á við og nýttu sér það. Við erum í raun heppnir að tapa ekki stærra," sagði Gunnar.

Næsti leikur Þróttar er við KR í Frostaskjóli á sunnudaginn. „Það er ekki verið að ráðast á garðinn þar sem hann er lægstur. Þetta stefnir í töff byrjun hjá okkur," sagði Gunnar og bætti við: „Við verðum að grafa djúpt eftir okkar vopnum en vonandi finnum við þau fyrir sunnudaginn."