Þýskaland og England leika til úrslita á EM í Finnlandi

Nú liggur ljóst fyrir að heims -og evrópumeistarar Þjóðverja mæta Englendingum í úrslitaleik á EM í Finnlandi.

Þýskaland vann Noreg 3-1 í seinni undanúrslitaleiknum sem fram fór í dag en staðan var 0-1 fyrir Noregi í hálfleik.

Norðmenn byrjuðu leikinn af miklum krafti og báru enga virðingu fyrir Þjóðverjum og Isabell Herlovsen skoraði fyrsta mark leiksins fyrir Noreg strax á 10. mínútu en það reyndist vera eina mark fyrri hálfleiks.

Þær þýsku sýndu þó styrk sinn enn og aftur í seinni hálfleik þegar þær skoruðu þrjú mörk en öll mörkin komu af bekknum.

Varamennirnir Simone Laudehr, Lira Bajramaj og Célia da Mbabi sáu um markaskorunina að þessu sinni og gulltryggðu Þjóðverjum farseðilinn í úrslitaleikinn sem fram fer á fimmtudag.