Neville gagnrýnir eltingarleik City á eftir Lescott

Fyrirliðinn Phil Neville hjá Everton er allt annað en sáttur með kaupæði forráðamanna Manchester City í sumar og þá síst af öllu hvernig þeir neita að gefast upp á að fá Joleon Lescott varnarmann og liðsfélaga Neville hjá Everton.

Everton hefur þegar neitað tveimur kauptilboðum upp á 15 og 18 milljónir punda og nú er von á þriðja kauptilboðinu, þrátt fyrir að forráðamenn Everton hafi alltaf sagt að Lescott sé ekki til sölu.

„Everton hefur þegar neitað tveimur kauptilboðum og knattspyrnustjórinn hefur alltaf sagt að hann vilji ekki missa Lescott og af hverju hætta forráðamenn City þá ekki og fara að einbeita sér að einhverju öðru? Ég efast samt um að City-menn hætti eða séu búnir að átta sig á þessum skilboðum frá Everton og það er sorglegt," segir pirraður Neville.