Sigurður Ragnar gerir þrjár breytingar - liðið liggur aftar

Sigurður Ragnar Eyjólfsson, kvennalandsliðsþjálfari, tilkynnti í kvöld byrjunarliðið sitt á móti Þýskalandi á morgun í lokaleik íslenska liðsins á Evrópumótinu í Finnlandi. Sigurður Ragnar tilkynnti liðið að venju á liðsfundi kvöldið fyrir leik.

Sigurður Ragnar gerir þrjár breytingar á byrjunarliðinu sem spilaði á móti Noregi í síðasta leik. Katrín Ómarsdóttir kemur aftur inn á miðjuna í stað Dóru Stefánsdóttur, Sif Atladóttir kemur í hægri bakvörðinn í stað Ernu B. Sigurðardóttur og Guðbjörg Gunnarsdóttir verður á milli stanganna í stað Þóru Helgadóttur. Katrín mun nú spila sem sóknartengiliður en Sara Björk er aftur á móti í stöðu varnartengiliðs með Eddu.

„Leikkerfið er hefðbundið og óbreytt frá síðasta leik - Fjögurra manna varnarlína, tveir varnartengiliðir, einn sóknartengiliður, marksæknir kantmenn og einn miðframherji - en áherslurnar breytast þó aðeins og mun liðið liggja aðeins aftar en í fyrstu tveimur leikjunum," segir í frétt á heimasíðu KSÍ.

Dómarinn í leik Þýskalands og Íslands er Finninn Kirsi Heikkiinen en hún dæmdi meðal annars úrslitaleik EM 19 ára landsliða kvenna þegar keppnin fór fram á Íslandi árið 2007.

Leikur Íslands og Þýskalands hefst klukkan 16.00 eða klukkan 13.00 að íslenskum tíma.

Byrjunarliðið á móti Þýskalandi á morgun:

Markvörður: Guðbjörg Gunnarsdóttir

Hægri bakvörður: Sif Atladóttir

Miðverðir: Guðrún Sóley Gunnarsdóttir og Katrín Jónsdóttir (fyrirliði)

Vinstri bakvörður: Ólína Guðbjörg Viðarsdóttir

Varnartengiliðir: Edda Garðarsdóttir og Sara Björk Gunnarsdóttir

Sóknartengiliður: Katrín Ómarsdóttir

Hægri kantmaður: Dóra María Lárusdóttir

Vinstri kantmaður: Hólmfríður Magnúsdóttir

Framherji: Margrét Lára Viðarsdóttir