Stelpurnar fá innblástur frá handboltalandsliðinu - úr leik ef þær tapa

Íslenska kvennalandsliðið er nýmætt til leiks á Lahden-leikvanginn í Lahti og þegar hópurinn gekk framhjá blaðamannaaðstöðunni þá hljómaði söngur karlahandboltalandsliðsins, "Við gerum okkar besta" í græjunum sem stelpurnar eru með sér. Þær sækja því innblástur til karlalandsliðsins í handbolta fyrir leikinn á móti Norðmönnum í kvöld.

Íslenska landsliðið má ekki tapa þessum leik í kvöld ætli liðið að halda í vonina um að komast í átta liða úrslitin þar sem að Þýskaland er að vinna stórsigur á Frakklandi í hinum leik riðilsins í dag.

Tapi íslenska liðið leiknum á móti Noregi verður það alltaf neðar en hin þrjú liðin sama hvernig fer í lokaleiknum á móti Þýskalandi. Ísland verður þá neðar en Frakkland og Noregur á innbyrðisleikjum og getur síðan ekki náð Þýskalandi að stigum.

Leikur Íslands og Noregs hefst klukkan 17.00 að íslenskum tíma.