Strætó bjóði út allan rekstur strætisvagna

Rekstur á strætisvögnum á höfuðborgarsvæðinu verður boðinn út til einkaaðila, verði farið að tillögum Par-x viðskiptaráðgjafar IBM, sem skilað hefur skýrslu til stjórnar Samtaka sveitarstjórna á höfuðborgar­svæðinu.

Mikill hallarekstur hefur verið á rekstri byggðarsamlagsins Strætó bs. Sveitarfélögin sem eiga Strætó leggja nú afar mikla áherslu á að þau þurfi ekki að bera neinar viðbótar byrðar vegna strætisvagnarekstursins. Meðal annars hefur verið brugðist við því með ákvörðun um að Strætó kaupi enga nýja vagna á næsta ári.

Endurskoðun fer nú fram á öllum grundvelli Strætó og stofnsamningi byggðasamlagsins. Meðal annars hefur Reykjavíkurborg uppi þá kröfu að fá tvo fulltrúa en ekki einn í stjórn Strætó enda leggur höfuðborgin til um sextíu prósent af því fé sem Strætó fær frá sveitarfélögunum. Í skýrslu Par-x er talað um að borgin fái jafnvel þrjá fulltrúa í stjórn.

Í skýrslunni er rætt um mögulegt framtíðarfyrirkomulag á rekstri Strætó. Inntakið í tillögum ráðgjafarfyrirtækisins er að Strætó verði eins konar sérfræðistofnun sem skipuleggi og tryggi almenningssamgöngur og annist síðan útboð á sjálfum rekstri vagnanna. Þetta myndi meðal annars þýða uppsagnir vagnstjóra og sölu á strætisvögnunum. Sagt er að greina þurfi sundur þann kostnað sem sé hjá Strætó í dag til að geta borið saman við verð sem bjóðist í útboðum á almennum markaði. Við þetta starf yrði nýtt reynsla og þekking núverandi starfsmanna Strætó.

Samkvæmt tillögu Par-x yrði viðfangsefni Strætó eingöngu tilteknar stofnleiðir. Vilji sveitar­félögin bjóða upp á þjónustu utan stofnleiðanna myndu þau sjálf þurfa að annast hana en fá þó aðstoð frá Strætó við útboð og slíkt.

Varðandi framtíðarstjórn á Strætó leggur Par-x til ýmsar leiðir sem hver og ein er sögð hafa kosti og galla. Meðal leiðanna sem stungið er upp á er að borgarstjóri og bæjarstjórar myndi stjórn Strætó, að Reykjavíkurborg fá fleiri fulltrúa í stjórn, eins og fyrr segir og að Reykjavíkurborg taki Strætó algjörlega yfir og selji hinum sveitarfélögunum síðan þjónustu fyrirtækisins. gar@frettabladid.is