Moyes ósáttur við vítaspyrnudóminn

David Moyes, stjóri Everton, talaði undir rós þegar hann tjáði sig um vítaspyrnudóminn sem varð til þess að Aston Villa jafnaði í 3-3 í leik liðanna í dag.

"Mér fannst nokkrar ákvarðanir hjá dómaranum geta fallið öðru hvoru megin," sagði Moyes eftir leikinn en varð svo var um sig.

"Ég vil ekki gagnrýna dómarann þar sem enska knattspyrnusambandið hefur tekið nægan pening af mér í sektir. Fóturinn var hátt uppi, en snerti hann hausinn á manninum? Ég held ekki. Mér fannst þetta strangur dómur," sagði Moyes.

Gareth Barry var sáttur við stigið. "Við vildum auðvitað vinna en það var mjög mikilvægt að tapa ekki. Þá hefðum við misst Everton fram úr okkur," sagði Barry.