Wenger ætlar ekki að flýta sér að eyða City-peningunum

Arsene Wenger, stjóri Arsenal, hefur ekki áhyggjur af því að liðið geti ekki keppt um enska meistaratitilinn þrátt fyrir að hann sé búinn að selja miðvörðinn Kolo Toure og framherjann Emmanuel Adebayor til Manchester City.

Wenger fékk 40 milljónir punda fyrir þá Toure og Adebayor en margir telja að liðið hafi ekki efni á að missa svo sterka leikmenn ef það ætlar að vinna sinn fyrsta titil síðan 2005.

„Við erum alveg nógu sterkir en ef við fáum tækifæri til þess að styrkja liðið þá munum við gera það," sagði Wenger.

„Fólk í Englandi heldur að hægt sé að leysa öll vandamál með því að kaupa nýja leikmenn. Það er mín trú að það skipti mestu máli að leikmenn leggi sig fram á æfingum, bæti sinn leik hægt og þétt og að leikmenn hafi traust til að standa sig vel," sagði Wenger.

Wenger hefur aðeins keypt einn leikmann í sumar en það er belgíski varnarmaðurinn Thomas Vermaelen frá Ajax. „Nú höfum við vissulega peninga til að kaupa nýja leikmenn en það er mjög mikilvægt að við eyðum þeim á réttan hátt," sagði Wenger sem hefur alltaf farið vel með aurinn í stjóratíð sinni hjá Arsenal.