Maradona lagðist á bæn

Diego Maradona, landsliðsþjálfari Argentínu, gerir sér vel grein fyrir því hversu mikilvægur leikurinn við Brasilíu er í kvöld og lagðist á bæn með leikmönnum liðsins í vikunni.

Leikurinn hefst klukkan 00.30 og er í beinni útsendingu á Stöð 2 Sporti.

Argentína er í slæmri stöðunni í riðlinum. Ef liðið tapar í kvöld á það á hættu að komast ekki í úrslitakeppni HM í Suður-Afríku, jafnvel þótt liði vinni alla þá hina leikina sem liðið á eftir í keppninni.

Það hugnast ekki mörgum knattspyrnuunnendum, allra síst í Argentínu.

Brasilía hefur ekki tapað síðustu sautján landsleikjum sínum og verður því viðureignin í kvöld gríðarlega erfið fyrir Maradona og hans menn.

Síðast þegar Argentínu mistókst að komast í úrslitakeppni HM var árið 1970 en nú er Maradona með leikmenn eins og Lionel Messi, Sergio Aguero og Carlos Tevez á sínum snærum. Það yrði því mikið áfall að komast ekki áfram nú.

Bænastundin fór fram á æfingasvæði liðsins á fimmtudaginn og þykir mörgum að hún gefi til kynna að Maradona sé að kikna undan álaginu.

Afrek hans sem leikmaður eru stórbrotin en sem þjálfari hefur hann ekki náð neinum sérstökum árangri og margir sem telja að hann hafi ekki hugmynd um hvað hann sé að gera.