Forsætisráðherra boðar orku- og auðlindaskatta

Óhjákvæmilegt er að breyta um stefnu og leggja upp með meira jafnræði og réttlæti í skattkerfinu, sagði Jóhanna Sigurðardóttir á flokksstjórnarfundi Samfylkingarinnar í dag. Hún sagði að ríkisstjórnin hyggðist meðal annars í því skyni jafna hlutföll milli tekjuskatta og fjármagnstekjuskatta og innleiða orku, umhverfis- og auðlindaskatta.

Jóhanna segir að hinir tekjuhærri verði að bera stærri hluta byrðanna. Skattheimtan verði að sönnu aukin vegna þess ástands sem Íslendingar glími við en eignaskattar- og erfðafjárskattar séu ekki inni í þeirri mynd. Mjög varlega verði einnig að fara í breytingar á óbeinum sköttum.

Í ræðu sinni benti Jóhanna Sigurðardóttir á skýrslu sem birt verður á næstunni, um stöðu og þróun lykiltalna í þjóðarbúskapnum. Þar komi fram að þær breytingar á skattstofnun og skattprósentum sem gerðar voru í þágu atvinnulífsins og áttu ekki síst að laða að erlenda fjárfestingu á Íslandi, hafi nánast engu skilað í þeim efnum.

„Áhugi erlendra aðila á fjárfestingum á Íslandi hefur hingað til nánast eingöngu átt við um stóriðju. Á undanförnum árum hafa Íslendingar hinsvegar í stórum stíl, flutt fjárfestingar sínar í erlend fjárfestingafélög og þau síðan fjárfest á Íslandi. Á sama tíma hefur ójöfnuður í tekjuskiptingu aukist verulega, meðal annars vegna minnkandi áhrifa skattkerfisins og bótagreiðslna á vegum ríkisins," sagði Jóhanna.

Jóhanna sagði að árið 1993 hafi ríkustu 1% fjölskyldna landsins verið með um 4% hlutdeild í ráðstöfunartekjum. Árið 2007 hafi verið orðin alger umskipti því þá hafi 1% ríkustu fjölskyldnanna verið með um 20% ráðstöfunartekna.

„Ekki nóg með það. 10% ríkustu fjölskyldna tvöfölduðu hlutdeild sína í ráðstöfunartekjunum á sama tíma og höfðu um 40% ráðstöfunartekna árið 2007. Aðrar íslenskar fjölskyldu, 90% fjölskyldna í landinu, skiptu 60% teknanna á milli sín árið 2007. Þetta eru ótrúlegar breytingar á skömmum tíma - og þær voru afleiðing markvissrar stefnu ríkisstjórnar Sjálfstæðisflokks og Framsóknarflokks, stefnu misskiptingar," sagði Jóhanna.