Jeppahópur bjargaði Spánverjum úr Krossá

„Ef bíllinn hefði farið tuttugu metrum lengra þá hefði hann oltið og óvíst hvort hægt hefði verið að bjarga fólkinu," segir Hilmar Viktorsson, leiðsögumaður hjá ferðaskrifstofunni Atlantik.

Það var fyrir snarræði bílstjóra ferðaskrifstofunnar sem tókst að bjarga tveimur spænskum ferðamönnum sem lentu í sjálfheldu úti í Krossá um hádegisbilið í dag.

Ferðamennirnir höfðu ekið út í Krossá á óbreyttum bílaleigubíl og tekið að reka með ánni. Að sögn Hilmars rak þá um 250 metra og var bíllinn nokkrum sinnum að því kominn að velta.

Ferðaskrifstofan Atlantik var á leið með hóp ítalskra ferðamanna til Þórsmerkur á sex sérútbúnum jeppum þegar bílstjórarnir urðu varir við hrakfarir ferðamannanna út í ánni.

Þeir hófu þegar björgunaraðgerðir og eltu tveir jeppanna bílinn meðfram straumharðri ánni. Annar keyrði upp fyrir bílinn til að taka strauminn af honum og hinn keyrði í hliðina á bílnum til að stöðva hann, en ökumennirnir samræmdu sig með talstöðvum.

Spánverjarnir tveir sluppu ómeiddir og bíllinn var í ágætu lagi, þó hann hafi beyglast örlítið og nokkuð flætt inn í hann að sögn Hilmars.

Aðspurður hvernig ítölsku ferðamönnunum hafi fundist að verða vitni að hasarnum segir Hilmar:

„Þeir eru bara í hálfgerðu sjokki, en hafa gaman af að hafa upplifað þetta fyrst allt fór vel."