Landon Donovan valinn bestur í bandarísku deildinni

Landon Donovan, félagi David Beckham hjá Los Angeles Galaxy í bandarísku MLS-deildinni, var í gær valinn mikilvægasti leikmaður tímabilsins en lið hans spilar til úrslita um bandaríska meistaratitilinn á sunnudaginn. Þetta er í fyrsta sinn sem Donovan fær þessa viðurkenningu en hann hafði fimm sinnum verið kosinn besti bandaríski leikmaðurinn.

Donovan hefur skorað 12 mörk og gefið 6 stoðsendingar í 25 leikjum á tímabilinu og í efsta hjá liðinu í báðum þessum tölfræðiþáttum. David Beckham hefur skorað 2 mörk og gefið 3 stoðsendingar í 11 leikjum á tímabilinu.

Landon Donovan er 27 ára kantmaður og hefur þegar skorað 42 mörk í 120 landsleikjum fyrir Bandaríkin. Hann hefur alls leikið 208 leiki í MLS-deildinni og skorað í þeim 96 mörk auk þess að gefa 75 stoðsendingar.