Norn hættir rekstri og íhugar að flytja úr landi

„Það er bara ekki rekstragrundvöllur fyrir þessu fyrirtæki," segir nornin Eva Hauksdóttir sem rak Nornabúðina á Vesturgötunni í miðborg Reykjavíkur. Nú ætlar Eva að loka búðinni um næstu mánaðamót. Sjálf segir hún ástæðuna margþætta, en í raun beina afleiðingu kreppunnar. Nú er svo komið að Eva íhugar einnig að flytja úr landi - og jafnvel slíta öllu stjórnmálasambandi við Ísland.

Eva Hauksdóttir hefur verið áberandi í mótmælum undanfarinna mánaða auk þess sem sonur hennar, Haukur Hilmarsson, hefur verið ötull á sama vettvangi. Eva ræddi meðal annars við Davíð Oddsson á meðan hann var enn Seðlabankastjóri og þá var hún áberandi eftir að lögreglan handtók son hennar ólöglega fyrir áramót.

Spurð hversvegna hún hyggist flytja úr landi segir Eva: „Það eru tvær ástæður fyrir að flytja úr landi. Annarsvegar vegna þess að atvinnuástandið hér á landi er ekki gæfulegt, svo er ég ekki hrifinn af því að taka þátt í hagkerfi sem vill borga skuldir einhverra drullusokka [útrásavíkinga. innsk.blm.] og selja sjálfstæði þjóðarinnar í hendur Alþjóðagjaldeyrissjóðsins."

Hún tekur þó fram að engin ákvörðun hafi verið tekinn um það hvort hún flytji úr landi eða ekki, það velti frekar á atvinnu og aðstæðum. Hún segir að áætlanirnar geti breyst, fari svo að henni bjóðist vinna við sitt hæfi.

Aðspurð hvaða afleiðingar hugsanleg brottför hennar muni hafa á mótmælin sem hafa verið fyrirferðamikil undanfarið svarar Eva yfirveguð: „Byltingin sér um sig sjálfa. Hún þarf ekkert á mér að halda. Ég hef engar áhyggjur af því."

En þangað til Eva fer af landi brott, það er að segja, láti hún af því verða, þá ætlar hún að beita sér fyrir frekari umræðum ,til að mynda um skilyrði AGS. Hún segist hafa talsverðar áhyggjur af skilyrðum sjóðsins, þá aðallega vegna þess að skýr svör fást ekki hjá ráðamönnum að hennar sögn.