Ítalir og Svíar á sigurbraut

Tveir leikir fóru fram í C-riðli á Evrópumeistaramótinu í knattspyrnu sem fer fram í Finnlandi. Ítalía vann 2-1 sigur á Englandi og Svíar fóru illa með Rússa, 3-0.

Þetta var fyrsti sigur Svía í fyrsta leik þeirra á stórmóti í knattspyrnu í síðustu átta tilraunum og sigurinn því kærkominn. Svíar skoruðu tvö skallamörk á fyrsta korterinu en þar voru þær Charlotte Rohlin og Victoria Sandell að verki.

Caroline Seger innsiglaði svo sigurinn með glæsilegu langskoti í síðari hálfleik.

Athygli vakti að í marki Rússa var hin nítján ára Elena Kochneva sem var að leika sinn fyrsta landsleik í dag. Það mátti skrifa fyrsta mark leiksins á hana en hún virtist nokkuð taugaóstyrk.

Ítalir unnu svo nokkuð óvæntan sigur á Englandi, 2-1. Casey Stoney, leikmanni enska liðsins var vikið af velli í fyrri hálfleik en skömmu síðar komust þær ensku engu að síður yfir. Fara Williams skoraði markið úr víti.

Á 56. mínútu jafnaði ítalska liðið metin. Patrizia Panico skoraði af stuttu færi eftir fyrrigjöf Tatiönu Zorri. Sigurmarkið skoraði Alessia Tuttino á 82. mínútu með glæsilegu langskoti.