Sigurður Ragnar: Ég held að Ísland og Noregur séu með álíka sterk lið

Sigurði Ragnari Eyjólfssyni, landsliðsþjálfara, tókst vel upp með að rífa stelpurnar okkar upp eftir tapið á móti Frökkum í fyrsta leik liðsins á EM og lokaundirbúningurinn fyrir Noregsleikinn gat því hafist í dag. Ísland mætir Noregi í Lahti á morgun.

„Við erum búin að afskrifa Frakkaleikinn og næsti leikur er alltaf mikilvægastur. Við mætum Noregi á morgun í algjörum úrslitaleik. Stelpurnar eru komnar í fínt skap sýnist mér," sagði Sigurður Ragnar.

„Við ætlum að einblína á okkur og aðeins að lagfæra hluti sem voru ekki í lagi hjá okkur á móti Frökkum. Það vantar betri varnarvinnslu. Æfingin í gær var bara til að ná upp góða skapinu og hrista úr okkur leikinn. Í dag förum við yfir nokkur taktískt atriði sem við ætlum að reyna að ná fram í leiknum á móti Noregi," sagði Sigurður Ragnar og bætir við:

„Það var margt jákvætt í þessum leik á móti Frakklandi og við getum tekið það með okkur inn í Noregsleikinn. Þetta var ekki allt ömurlegt þótt að við höfum tapað. Ef þú tekur þessar vítaspyrnur í burtu þá hefði staðan verið 1-1 þannig að við horfum jákvætt á hlutina. Við tökum þetta jákvæða með okkur í næsta leik," sagði Sigurður Ragnar.

Það hefur gengið á ýmsu hjá norska liðinu á þessu ári og liðið hefur verið allt annað en sannfærandi í mörgum leikjanna.

„Þær byrjuðu árið ekki vel og það gekk ekki vel hjá þeim á Algarve. Þær hafa síðan verið að vinna sig upp og unnu Svíþjóð stuttu fyrir lokakeppnina. Þær voru líka lengi bara 1-0 undir á móti Þjóðverjum en þær hrundu við að fá á sig annað markið og Þjóðverjarnir gengu á lagið og gengu frá þeim í restina. Þýskaland er með ógnarsterkt lið," segir Sigurður Ragnar.

Sigurður Ragnar er ekki á því að 3-1 sigurinn á Noregi í febrúar hafi verið jafn sannfærandi og tölurnar kannski hljóma."Við unnum þær í mars en það var mjög jafn leikur sem hefði getað farið á hvorn veginn sem var," sagði Sigurður Ragnar og hann veit að þetta verður spennandi leikur

„Ég held að Ísland og Noregur séu með álíka sterk lið. Norðmenn eiga fullt af góðum leikmönnum en við eigum líka fullt af góðum leikmönnum. Þetta er spurning um hverjar standa sig á fimmtudaginn," sagði Sigurður Ragnar að lokum.