Byrjunarliðið á móti Noregi á morgun - Dóra kemur aftur inn í liðið

Sigurður Ragnar Eyjólfsson, kvennalandsliðsþjálfari, tilkynnti í kvöld byrjunarliðið sitt á móti Noregi á morgun í öðrum leik íslenska liðsins á Evrópumótinu í Finnlandi. Sigurður Ragnar tilkynnti liðið að venju á liðsfundi kvöldið fyrir leik.

Sigurður Ragnar gerir eina breytingu á liðinu frá því á móti Frökkum þar sem Dóra Stefánsdóttir kemur inn á miðjuna í stað Katrínar Ómarsdóttur.

Það vantar tvo leikmenn sem voru í byrjunarliðinu þegar íslensku stelpurnar unnu 3-1 sigur á Noregi í Algarve-bikarnum í mars. Guðbjörg Gunnarsdóttir var þá í markinu og Ásta Árnadóttir í hægri bakvarðarstöðunni. Þar eru núna Þóra Björg Helgadóttir og Erna Björk Sigurðardóttir.

Þjóðirnar mætast á Lahden leikvanginum í Lahti og hefst leikurinn kl. 17:00 að íslenskum tíma. 

Byrjunarliðið á móti Noregi á morgun:

Markvörður: Þóra Björg Helgadóttir

Hægri bakvörður: Erna Björk Sigurðardóttir

Miðverðir: Guðrún Sóley Gunnarsdóttir og Katrín Jónsdóttir (fyrirliði)

Vinstri bakvörður: Ólína Guðbjörg Viðarsdóttir

Varnartengiliðir: Edda Garðarsdóttir og Dóra Stefánsdóttir

Sóknartengiliður: Sara Björk Gunnarsdóttir

Hægri kantmaður: Dóra María Lárusdóttir

Vinstri kantmaður: Hólmfríður Magnúsdóttir

Framherji: Margrét Lára Viðarsdóttir