Clichy ekki spenntur fyrir Real

Gael Clichy hefur ekki áhuga á því að ganga til liðs við Real Madrid eftir því sem fram kemur í viðtali við hann á heimasíðu Sky Sports.

Clichy er sagður undir smásjá Real sem hefur þegar fest kaup á Kaka og er á góðri leið með að landa Cristiano Ronaldo.

Clichy kom til Arsenal frá Cannes árið 2003 og ætlar að virða þann langtímasamning sem hann gerði við félagið í fyrra.

„Það er frábært að vera orðaður við Real en ég ætla mér að vinna titla með Arsenal," sagði Clichy.

Því er einnig haldið fram í spænskum fjölmiðlum að Atletico Madrid og Espanyol gætu gert tilboð í Emmanouel Eboue, félaga Clichy hjá Arsenal, nú í sumar.