Ronaldo og Robinho hafa notað eiturlyf

Brasilíska goðsögnin Pelé lét hafa eftir sér ummæli í réttarsal á dögunum sem eiga klárlega eftir að draga einhvern dilk á eftir sér. Pelé mætti fyrir rétt þar sem sonur hans er vegna vandamála en hann hefur viðurkennt að vera háður kókaíni.

„Það er ósanngjarnt að tala um eiturlyf í fótbolta út af einu eða tveim atvikum eins og hjá Ronaldo og Robinho sem eiga við þetta vandamál að stríða," sagði Pelé og var þar að vísa til brasilíska Ronaldo en ekki þess portúgalska.

Pelé vill meina að þeir hafi neytt eiturlyfja í einkateiti í Sau Paulo.

Brasilíumaðurinn aldni lét Diego Maradona einnig heyra það og sagði hann vera neikvæða fyrirmynd.

„Hann var frábær leikmaður en því miður hafa allir séð hvað hann gerði síðan við líf sitt," sagði Pelé sem vill meina að Kaká, Platini og Beckenbauer séu bestu fyrirmyndirnar í fótboltaheiminum.

„Kaká er dæmi um frábæra fyrirmynd og svo hafa Platini, Beckenbauer og fleiri alltaf verið til fyrirmyndar. Það eru margar góðar fyrirmyndir í fótboltanum og óþarfi að beina alltaf ljósinu að nokkrum neikvæðum atvikum," sagði Pelé en líklegast munu landar hans svara hressilega fyrir þessar ásakanir.