Dossena nálgast endurkomu til Ítalíu

Samkvæmt umboðsmanni Ítalans Andrea Dossena hjá Liverpool er fátt sem getur komið í veg fyrir að leikmaðurinn snúi aftur á heimaslóðir í sumar. En Serie A-félagið Napólí er búið að ná samkomulagi við Liverpool um kaupverð sem er talið nema um 4,3 milljónum punda.

„Liverpool er búið að ná samkomulagi við Aurelio De Laurentiis, stjórnarformann Napólí. Þetta er bara spuning um hvenær, ekki hvort gengið verði formlega frá málunum. Dossena vill fara til Napólí og við bíðum bara eftir símatalinu," er haft eftir umboðsmanni Dossena í samtali við Radio Kiss Kiss í Napólí.

Dossena kom til Liverpool frá Udinese síðasta sumar á um helmingi hærra kaupverð en talað er um að Napólí sé búið að bjóða núna en leikmaðurinn hefur ekki náð að festa sig í sessi á Anfield.