Margrét Lára: Við þurfum fyrst og fremst að þétta liðið aðeins betur

Margrét Lára Viðarsdóttir verður ein í framlínu íslenska landsliðsins á móti Noregi eins og oft áður en vonast til þess að fá meira boltann en í tapleiknum á móti Frakklandi.

„Það tók alveg tíma að komast yfir þennan Frakkaleik og við getum alveg viðurkennt það. Við erum farnar að brosa og hlæja aftur sem er bara jákvætt því það þýðir ekkert annað," sagði Margrét Lára.

„Við þurfum fyrst og fremst að þétta liðið aðeins betur, varnar- og sóknarlega. Við þurfum að spila aðeins betri vörn og beita þessum skyndisóknum. Við fengum færi á móti Frökkunum og þá fáum við færi á móti Norðmönnunum. Við þurfum að halda liðinu betur þéttu allstaðar á vellinum og þá er ég ekki í vafa um að við vinnum þennan leik," sagði Margrét Lára en hún veit að leikurinn verður mjög erfiður.

„Þær eru með hörkulið og við getum ekki litið framhjá því. Þær eru með góða leikmenn í öllum stöðum og voru ekki að fá á sig mark í opnum leik á móti Þýskalandi fyrr en á 89. mínútu og þá fá þær þrjú mörk á sig. Við þurfum að eiga okkar besta leik til þess að vinna þær," sagði Margrét Lára.