Stelpurnar okkar: Ekkert gefið eftir á æfingum rétt fyrir mót

Stelpurnar okkar eru ekkert að spara sig á síðustu æfingunum fyrir EM sem hefst með leik við Frakka á morgun. Tveir leikmenn meiddust á fyrstu æfingunni í Tampere á föstudaginn og fór Sif Atladóttir meðal annars í skoðun hjá augnlækni eftir að hafa fengið högg á augað.

Sigurður Ragnar Eyjólfsson, landsliðsþjálfari segir þetta ekkert vera skrítið því þær séu allar að sanna sig fyrir honum til þess að fá tækifæri í byrjunarliðinu á móti Frökkum á morgun.

„Þær gerist alveg að leikmenn meiðast á æfingum og fá smá pústra. Við spiluðum í bara sjö mínútur á æfingunni í gær (föstudag) og það fóru tveir leikmenn útaf meiddir. Maður sannar sig á æfingunum og þær þurfa spila þar á sama tempói og í leik," segir Sigurður Ragnar og bætir við:

„Við höfum lagt mikið upp úr því að fá leikmenn til að æfa á háu tempói og á sama tempói og í leik. Þær leggja líka inn á æfingunum en ekki bara á leikjum með sínu félagsliði eða í leikjum með landsliðinu. Það er hægt að bera þær betur saman á æfingunum. Þær eru líka mjög metnaðarfullar og vilja vinna þó að það sé bara leikur á milli ungra og gamla á æfingu. Þær vilja vinna alla leiki og þá er ákefðin mikil," sagði Sigurður Ragnar.