Aðeins fimm af ellefu fastamönnum í byrjunarliði Þýskalands

Silvia Neid, þjálfari Þýskalands, hefur ákveðið að hvíla sex byrjunarliðsmenn í leiknum á móti Íslandi í dag en þýska liðið hefur þegar tryggt sér sigurinn í riðlinum. Fyrirliðinn Birgit Prinz er þó samt á sínum stað í byrjunarliðinu.

Melanie Behringer, Inka Grings, Linda Bresonik, Kim Kulig, Kerstin Garefrekes og Bianca Schmidt eru hvíldar í dag en þær Grings, Bresonik og Behringer skoruðu saman fjögur mörk í fyrstu tveimur leikjunum. Bresonik og Kulig eru með spjald á bakinu en þær hafa verið valdar bestu menn vallarins í fyrstu tveimur leikjunum.

Birgit Prinz er á sínum stað í byrjunarliði Þýsklands en þessi mikla markadrottning á enn eftir að opna markareikninginn sinn í mótinu. Hún átti hinsvegar tvær glæsilegar stoðsendingar í sigrinum á Frökkum.