Katrín: Það var engin ein að klikka á móti Frökkum

Katrín Jónsdóttir, fyrirliði íslenska landsliðsins, er sannfærð að Ísland sé með betra lið en Noregur en þjóðirnar mætast í Lahti í dag í öðrum leik sínum á Evrópumótinu í Finnlandi. Hún segir að liðið sé búið að vinna sig út úr vonbrigðum Frakkaleiksins.

„Það var ekki neinn einn leikmaður sem var að klikka á móti Frökkum heldur var allt liðið varnarlega séð ekki nægilega þétt," segir Katrín og bætir við:

„Ef við erum ekki nógu þéttar þá erum við of langt frá mönnunum og þá verður þetta eltingarleikur. Þegar maður síðan loksins vinnur boltann þá er maðurinn orðinn þreyttur og gæðin í sendingunum ekki góð. Eitt leiddi af öðru. Lykillinn er að ná upp góðum varnarleik og spila þéttar. Við verðum bara að ná því ef við ætlum að ná árangri," segir Katrín.

„Við ætlum að taka það sem við gerðum vel með okkur í næsta leik og bæta það sem gekk ekki eins vel. Þegar ég horfi á okkar hóp og þeirra hóp þá finnst mér við eiga fulla möguleika í þetta lið," segir Katrín.