Hólmfríður: Allar ætla að gefa 190 prósent í tæklingar og návígi

Hólmfríður Magnúsdóttir skoraði eina mark íslenska liðsins á móti Frökkum sem varð sögulegt mark enda fyrsta mark íslenska knattspyrnulandsliðs á stórmóti. Hólmfríður segir ekkert koma til greina nema að vinna Norðmenn í öðrum leik liðsins í dag.

„Það er alltaf að sárt að tapa og við leynum því ekkert. Það er líka jafnskemmtilegt að vinna sem við ætlum að gera í næsta leik," segir Hólmfríður.

„Við munum hver ein og einasta fara af fullu inn í þennan leik. Það mun engin gefa neitt eftir og ég er viss um það að við eigum allar eftir að gefa 190 prósent í tæklingar og návígi. Við vitum það að ef við vinnum einvígin þá munum við enda á því að vinna leikinn," segir Hólmfríður.

„Það var að fara yfir Frakkaleikinn á myndbandi og við munum læra af honum. Við erum bjartsýnar, það eru allar komnar í gott skap og ég hef engar áhyggjur af þessum leik," sagði Hólmfríður að lokum.