Guðrún Sóley: Þóra er búin að vara mig við framherjanum úr Kolbotn

Guðrún Sóley Gunnarsdóttir var með á æfingu í gær og er tilbúin í slaginn á móti Norðmönnum í dag. Guðrún fékk gat á hausinn í leiknum á móti Frakklandi á mánudagskvöldið en hún hefur byrjað alla leiki sem Sigurður Ragnar Eyjólfsson hefur stjórnað kvennalandsliðinu.

„Við stóðum okkur vel á móti Noregi síðast og við eigum alveg að geta unnið þær. Við trúum því að við tökum þær," sagði Guðrún Sóley sem hefur fengið góð ráð frá Þóru Björg Helgadóttur, markverði.

„Þóra er búin að vara mig við framherjanum Isabell Herlovsen sem spilar með henni í Kolbotn og hefur sagt að hún sé heit. Það er fín fyrir okkur að vita af henni og við mætum bara tilbúnar á móti henni," sagði Guðrún Sóley.