Erna Björk: Vantaði herslumuninn

Erna Björk Sigurðardóttir sagði það afar svekkjandi að hafa ekki náð að klára leikinn gegn Noregi almennilega í kvöld.

Ísland tapaði leiknum, 1-0, og á þar með engan möguleika á að komast áfram í fjórðungsúrslitin á EM í Finnlandi.

„Þetta gekk betur í kvöld en á móti Frökkunum í fyrsta leiknum. Spiliið var betra og við vorum nær mönnunum okkar. Baráttan var líka góð en það er svekkjandi að ná ekki að klára leikinn almennilega þegar allt er til staðar. Það vantaði bara herslumuninn til að við næðum að skora."

„Ég held að það séu allir svekktir að við fengum ekki meira út úr mótinu eftir alla þá vinnu sem allir hafa lagt í undirbúninginn. Það er leiðinlegt að hafa náð ekki að vinna annan leikinn, líka fyrir alla þá áhorfendur sem komu til að fylgjast með."

„Vonandi fá áhorfendur að sjá sigurleik hjá okkur gegn Þjóðverjum á sunnudaginn. Ég held að þá munum við leggja allt í sölurnar því við höfum engu að tapa."