Guðrún Sóley: Gerir okkur ekkert nema gott að mæta Þjóðverjum

Guðrún Sóley Gunnarsdóttir segir íslenska liðið ætla að njóta þess að fá tækifæri til þess að mæta Heims-og Evrópumeisturum Þjóðverja þegar þær spila lokaleik sinn á EM í dag. Leikurinn hefst klukkan 13.00 að íslenskum tíma.

„Við æfum okkur á að spila við Þjóðverja. Það er frábært að fá að mæta heimsmeisturunum og þetta gerir okkur ekkert nema gott," sagði Guðrún Sóley.

„Í fyrsta leiknum vorum við svolítið stressaðar og það tók smá tíma fyrir okkur að átta sig á þessu EM-móti. Hin liðin voru með meiri reynslu en við í svona stórmóti. Það hefur síðan verið stígandi í leik okkar," sagði Guðrún Sóley.

Hún er ekki mikið að velta fyrir sér andstæðingum dagsins heldur ætlar bara að skila sínu. „Ég pæli voðalega lítið í því hverjir eru í hinu liðinu. Ég er tilbúinn að taka hvern sem er hvenær sem er og veit það að maður þarf alltaf að vera tilbúin," sagði Guðrún Sóley.