Sif: Ánægð með leikinn en markið þeirra var ömurlegt

Sif Atladóttir fékk sitt fyrsta tækifæri á Evrópumótinu á móti Þýskalandi í dag og nýtti það vel. Sif var mjög grimm og ákveðin og spilaði mjög vel í hægri bakvarðarstöðunni.

„Ég er rosalega ánægð með leikinn en markið sem við fengum á okkur var ömurlegt," sagði Sif eftir leikinn en hún sagði allir í íslenska hópnum hafi hjálpað til að gera þetta að góðum lokaleik hjá liðinu.

„Við komum inn í leikinn með því hugarfari að undirbúa okkur fyrir Frakkaleikinn sem er seinna í haust. Við töluðum líka um að við ætluðum ekki að bera neina virðingu fyrir þessum stelpum þó mikið sé búið að tala um þeirra karlmannlegu hlið. Þetta eru bara ellefu stelpur eins og við," sagði Sif.

„Við unnum mjög vel saman og allt liðið var þétt og vel skipulagt. Við hjálpuðumst mikið að en við vorum kannski svolítið fámennar fram á við og of uppteknar við varnarhlutverkin. Við slípum það fyrir næsta leik. Þetta var mjög jákvæður dagur," sagði Sif að lokum.