Katrín: Við vitum að allar þurfa að eiga toppleik

Katrín Jónsdóttir fyrirliði íslenska kvennalandsliðsins er ein af fáum í íslenska liðinu sem hefur mætt áður Heims- og Evrópumeisturum Þjóðverja. Ísland og Þýskaland mætast í dag í lokaleik stelpnanna okkar á EM í Finnlandi. Leikurinn hefst klukkan 13.00 að íslenskum tíma.

„Þetta verður ótrúlega gaman. Ég hef spilað einhverja sex eða átta leiki við Þýskaland en það er mjög langt síðan," sagði Katrín.

„Það hafa ekki margar í hópnum mætt þeim en þá voru þær svo langt, langt fyrir framan okkur. Liðið okkar í dag er miklu betra og það er allt hægt í fótbolta. Við förum í þann leik eins og alla með það markmið að vinna hann. Við vitum að allar þurfa að eiga toppleik til þess að það takist," sagði Katrín.

„Mér finnst að við höfum sýnt það í síðustu tveimur leikjum að við eigum skilið að vera hérna og fólk vill enda þetta mót vel. Þetta verður mjög gaman," sagði fyrirliðinn að lokum.